- ಜೊಸ್ಸಿ ಉರ್ವಾ
.jpg)
ಪೊಂಪಯ್ ಮಾಯೆಚಿ ಪರಬ್ ಲಾಗಿಂ ಆಯ್ಲಿ ಮ್ಹಣ್ತಾನಾ ಭೊಗ್ಣಾಂ ಉಮಾಳ್ತಾತ್ ಆನಿ ಉಡಾಸ್ ಜಿವೆ ಜಾತಾತ್. ಸುಮಾರ್ ಸಾಟ್ ವರ್ಸಾಂ ಆದಿಂ, ಮ್ಹಜ್ಯಾ ಭುರ್ಗ್ಯಾಪಣಾರ್ ಮಾಂಯ್ ಯಾ ವ್ಹಡ್ಲಿಮಾಂಯ್ ಸಂಗಿಂ ಹಾಂವ್ ಮಿಸಾಕ್ ಯೆತಾಲೊಂ. ತೆದಾಳಾ ಇಗರ್ಜೆಚ್ಯಾ ಆದ್ಲ್ಯಾ ಬಾಂದ್ಪಾಂತ್ ಮುಡ್ಲಾ ಕುಶಿಚ್ಯಾ ಬೊಲ್ಕಾಂವಾಂತ್ (ವಿಂಗ್) ಪೊಂಪಯ್ ಮಾಯೆಚೆಂ ಪಿಂತುರ್ ಆನಿ ಆಲ್ತಾರ್ ಆಸೊನ್ ಗ್ರಾದ್ ಆಸ್‌ಲ್ಲಿ. ತೊ ಬೊಲ್ಕಾಂವ್ ಸ್ತ್ರೀಯಾಂಕ್ ಅಮಾನತ್ ಕೆಲ್ಲೊ ಜಾಲ್ಲ್ಯಾನ್ ಮಿಸಾಕ್ ಆಯಿಲ್ಲ್ಯೊ ಸ್ತ್ರೀಯೊ ಲ್ಹಾನಾ ಭುರ್ಗ್ಯಾಂಕ್ ಆಪ್ಣಾ ಸಂಗಿಂ ಸಾಂಬಾಳ್ತಾಲ್ಯೊ ಜಾಲ್ಲ್ಯಾನ್ ಹಾಂವ್ ಮಾಂಯ್ ಯಾ ವಡ್ಲಿಮಾಂಯ್ ಸಂಗಿಂ ಥಂಯ್ಸರ್ ಮೀಸ್ ಆಯ್ಕಾತಾಲೊಂ. ಹಾಂಗಾಸರ್ ‘ಆಯ್ಕಾತಾಲೊಂ’ ಮಳ್ಳೊ ಸಬ್ದ್ ಸಮಾ ಮ್ಹಣ್ ಭೊಗ್ತಾ. ಕಿತ್ಯಾಕ್ ಮ್ಹಳ್ಯಾರ್ ತ್ಯಾ ಕಾಳಾರ್ ಲಾತ್ಯಾ ಭಾಷೆನ್ ಮೀಸ್ ಭೆಟಯ್ತಾಲೆ ಆನಿ ಲಾತೆಂ ಸಮ್ಜಾನಾತ್‌ಲ್ಲ್ಯಾ ಹಾಂವೆಂ ಮೀಸ್ ‘ಆಯ್ಕೊಂಚೆಂ’ ಆಸ್‌ಲ್ಲೆಂ. ತರೀ ಮಿಸಾ ವೆಳಾರ್ ವ್ಹಡಿಲಾಂ ಆಮ್ಕಾಂ ಭಕ್ತಿಪಣ್ ಆನಿ ಸಾಮಾನ್ಯ್ ಮಾಗ್ಣಿಂ ಶಿಕಯ್ತಾಲಿಂ. ಸಾಂಜೆಚ್ಯಾ ತೆರ್ಸಾ ಉಪ್ರಾಂತ್ ಪೊಂಪಯ್ ಸಾಯ್ಬಿಣಿಚಿಂ ಮಾಗ್ಣಿಂ ಮ್ಹಣ್ತಾಲಿಂ. ಮಿಸಾಚ್ಯಾ ಸಹಭೆಟವ್ಣೆಚಿ ರಿವಾಜ್ ನಾತ್‌ಲ್ಲ್ಯಾ ತ್ಯಾ ಕಾಳಾರ್ ಸಬಾರ್ ಪಾವ್ಟಿಂ ಪ್ರಧಾನ್ ಆಲ್ತಾರಿರ್ ಏಕ್ ಯಾಜಕ್ ಮೀಸ್ ಭೆಟವ್ನ್ ಆಸ್ತಾನಾಂಚ್ ಪೊಂಪಯ್ ಮಾಯೆಚಾ ಆಲ್ತಾರಿರ್ ಅನ್ಯೇಕ್ ಯಾಜಕ್ ತಾಚೆಂ ರಜಾರ್ ಮೀಸ್ ಭೆಟಯ್ತಾಲೊ. ಬಸ್ಕೆಚಿ ವ್ಯವಸ್ಥಾ ತವಳ್ ನಾತ್‌ಲ್ಲಿ ಜಾಲ್ಲ್ಯಾನ್ ಲೋಕ್ ಧರ್ನಿರ್‌ಚ್ ಬಸ್ತಾಲೊ. ಥೈಂಸರ್ ಆಸ್‌ಲ್ಲೆಂ ಪೊಂಪಯ್ ಮಾಯೆಚೆಂ ಪಿಂತುರ್ ಮ್ಹಾಕಾ ಆತುರಾಯೆಚೆಂ ಜಾವ್ನ್ ಆಸ್‌ಲ್ಲೆಂ. ಮಾಯೆಚಿ ಆನಿ ಜೆಜುಚಿ ವಳಕ್ ಮ್ಹಾಕಾ ಆಸ್‌ಲ್ಲಿ ತರೀ, ಇತರ್ ಮ್ಹಳ್ಯಾರ್ ಸಾಂತ್ ಡೊಮಿನಿಕ್, ಸಿಯೆನಾಚಿ ಸಾಂತ್ ಕಾತ್ರಿನ್, ಜನೆಲಾ ಥಾವ್ನ್ ದಿಸ್ಚೊ ವೆಸುವಿಯಸ್ ಜ್ವಾಲಾಮುಖಿ ಪರ್ವತ್, ಪಾಲ್ಕ್ಯಾಚಿ ವಾಟ್ ಇತ್ಯಾದಿ ಮಾಕಾ ಕಳಿತ್ ಜಾಲ್ಲೆಂ ಹಾಂವ್ ವ್ಹಡ್ ಜಾಲ್ಯಾ ಉಪ್ರಾಂತ್‌ಚ್.
ಆಪ್ಲ್ಯಾ ಹಿತ್ಲಾಂತ್ ಯಾ ಗಾದ್ಯಾನಿಂ ಜಾಲ್ಲೆಂ ಪ್ರಥಮ್ ಫಳ್ ಯಾ ನಾರ‍್ಲ್ ಗಾಣ್ಯಾಕ್ ಘಾಲ್ಲ್ಯಾಂತ್ಲೆಂ ಏಕ್ ಬೊತ್ಲ್ ತೇಲ್ ಪೊಂಪಯ್ ಸಾಯ್ಬಿಣಿಕ್ ಭೆಟಂವ್ಚಿ ರಿವಾಜ್ ಆಸ್‌ಲ್ಲಿ. ಕೃಷಿ ತಶೆಂ ಹಿತ್ಲಾಂತ್ ರೂಕ್ ಝಡಾಂ ಉಣಿಂ ಜಾಲ್ಲ್ಯಾ ಹ್ಯಾ ಕಾಳಾರ್ ಹಿ ರಿವಾಜ್ ಉಣಿ ಜಾಲ್ಯಾ. ಪರಿಕ್ಷೆಚ್ಯಾ ವೆಳಾ, ಪ್ರತ್ಯೇಕ್ ಜಾವ್ನ್ ತೆದಾಳಾ ಆಸ್‌ಲ್ಲ್ಯಾ ಮೆಟ್ರಿಕ್ ಪರಿಕ್ಷೆಚ್ಯಾ ವೆಳಾರ್ ಫಿರ್ಗಜೆಚಿಂ ಆನಿ ಭಾಯ್ಲ್ಯಾ ಫಿರ್ಗಜೆಚಿಂ ಕ್ರಿಸ್ತಾಂವ್ ಆನಿ ಅಕ್ರಿಸ್ತಾಂವ್ ಭುರ್ಗಿಂ ಪ್ರತ್ಯೇಕ್ ಥರಾನ್ ನವೆನ್ ಕರ್ನ್ ಮಾಗ್ತಾಲಿಂ ಆನಿ ಸಾಯ್ಬಿಣ್ ತಾಂಕಾಂ ಸೊಡ್ನ್ ಘಾಲಿನಾತ್‌ಲ್ಲಿ.
ಆದಿಂ ಜನಸಂಖೊ ಉಣೊ ಆಸ್‌ಲ್ಲ್ಯಾ ವೆಳಾರ್ ಫೆಸ್ತಾಚೆಂ ಮೀಸ್ ಇಗರ್ಜೆ ಭಿತರ್‌ಚ್ ಭೆಟಯ್ತಾಲೆ. ಲಾಗ್ಸಿಲ್ಯಾ ಅನಿ ಪಯ್ಸಿಲ್ಯಾ ಹೆರಾಂ ಫಿರ್ಗಜಾಂ ಥಾವ್ನ್ ಆನಿ ಪ್ರತ್ಯೇಕ್ ಜಾವ್ನ್ ಸೆಜಾರಿ ಫಿರ್ಗಜಾಂ ಥಾವ್ನ್ ಜಾಯ್ತೊ ಲೋಕ್ ಯೆತಾಲೊ. ವಠಾರಾಂತ್ ಜಾಯ್ತೊ ಅಕ್ರಿಸ್ತಾಂವ್ ಲೋಕ್ ಆಸ್ತಾಲೊ. ಪೊರ್ಟಿಕೊಂತ್ ರುಕಾಡಾಚಿ ಪುಲ್ಪುತ್ರ್ ದವರ‍್ನ್, ತಾಚೆ ಥಾವ್ನ್ ಲಾಂಬ್ ಖಾಡಾಂಚೆ ಯಾಜಕ್ ತುಳು ಭಾಷೆನ್ ಸಂಪ್ಯಾ ಉತ್ರಾಂನಿ ಮರಿಯೆಚಿ ವಳಕ್ ಸಾಂಗ್ತಾಲೆ ಆನಿ ಮಹಿಮಾಂ ಪರ್ಗಟ್ತಾಲೆ. ಯಾಜಕಾಂಕ್ ಅಕ್ರಿಸ್ತಾಂವಾಂ ಲಾಗಿಂ ಬರೊ ಸಂಬಂಧ್ ಆಸ್ತಾಲೊ ಅನಿ ತಾಂಚೆ ಪ್ರಸಂಗ್ ಲೊಕಾ ಮದೆಂ ಭಕ್ತಿಪಣ್ ವಿಸ್ತಾರುಂಕ್ ಕಾರಣ್. ವೀಜ್ ದಿವೆ ಭೋವ್ ಉಣೆಂ ಆಸ್‌ಲ್ಲ್ಯಾ ತ್ಯಾ ಕಾಳಾರ್ ಪುರ‍್ಶ್ಯಾಂವಾಕ್ ಮುಕಾರ್ ಗ್ಯಾಸ್ ಲೈಟ್ ವರ್ತಾಲೆ ತರ್ ವಾಟೆಚ್ಯಾ ದೆಗೆರ್ ಆಡ್ ವಾಶ್ಯಾಂಚೆರ್ ಪಣ್ತ್ಯೊ ಜಳಯ್ತಾಲೆ. ಪುರ‍್ಶಾಂವಾಚ್ಯಾ ವಾಟೆರ್ ಸಭಾರ್ ಅಕ್ರಿಸ್ತಾಂವ್ ಆಪ್ಲ್ಯಾ ಘರಾಂಚ್ಯಾ ದೊರ‍್ಯಾಂಚೆರ್‌ಯೀ ಪಣ್ತ್ಯೊ ಜಳಯ್ತಾಲೆ. ಫೆಸ್ತಾಚ್ಯಾ ಆಖೆರಿಕ್ ಲಾಸ್ಚಿ ದಾರು ಬೋವ್ ಆಕರ‍್ಶಿಕ್ ಜಾವ್ನಾಸ್‌ಲ್ಲಿ. ಸಾಮಾನ್ಯ್ ಜಾವ್ನ್ ಫೆಸ್ತಾಚೆಂ ಆಚರಣ್ ಅಕ್ಟೋಬರ್ ಮಹಿನ್ಯಾಂತ್ ಜಾತಾಲೆಂ. ಪುಣ್ ಕ್ರಮೇಣ್ ವಾತಾವರಾಣಾಚೆಂ ನಿಯಮ್ ಚುಕೊನ್ ಯೆತಾನಾ, ಅಕ್ಟೋಬರಾಂತ್ ಪ್ರತಿಕೂಲ್ ಹವೊ ಮಣ್ಜೆ ವಾರೆಂ ಪಾವ್ಸ್ ಯೆಂವ್ಕ್ ಸುರು ಜಾಲ್ಲ್ಯಾನ್, ಆಚರಣ್ ಡಿಸೆಂಬರಾಕ್ ಪಾಟಿಂ ವೆಲೆಂ, ತರೀ ಸಭಾರ್ ಪಾವ್ಟಿಂ ಡಿಸೆಂಬರಾಂತ್ ಪಾವ್ಸ್ ಆಯಿಲ್ಲೊಯೀ ಆಸಾ!
ಉರ್ವಾ ಫಿರ್ಗಜೆಚಿ ಪಾತ್ರೊನ್ ಕೊಸೆಸಾಂವ್ ಸಾಯ್ಬಿಣ್ ತರೀ, ಲೋಕ್ ಮಾಯೆಕ್ ಪೊಂಪಯ್ ಸಾಯ್ಭಿಣಿಚ್ಯಾ ರುಪಾರ್ ಚಡ್ ಭಕ್ತಿಪಣ್ ಆಧಾರ‍್ತಾ. ಪಯ್ಲ್ಯಾ ಸುವಾತೆರ್ ಪೊಂಪಯ್ ಸಾಯ್ಬಿಣಿ ಥಂಯ್ ಭಕ್ತಿಕ್ ಎಕಾ ಮಾತೆಚೆಂ ರೂಪ್ ಪಳೆಯ್ತಾ ಆನಿ ಮಾನಾನ್ ಆನಿ ಭಕ್ತಿಪಣಾನ್ ದೆಖ್ತಾ. ದೆವಾಚ್ಯಾ ಮಾಯೆಲಾಗಿಂ ಮಾಗ್‌ಲ್ಲೆ ಉಪ್ಕಾರ್ ಮೆಳ್ತಾತ್ ಮ್ಹಳ್ಳೊ ಅಖಂಡ್ ಭರ್ವಸೊ ಆನಿ ಕಷ್ಟಾ ಅನ್ವಾರಾಂತ್ ಸೊಡ್ನ್ ಘಾಲಿನಾ ಮಳ್ಳಿ ಪಾತ್ಯೆಣಿ ಆಸಾ ಜಾಲ್ಲ್ಯಾನ್ ಹೆಂ ಭಕ್ತಿಪಣ್ ವಿಸ್ತಾರ‍್ಲಾಂ. ಸಭಾರಾನಿಂ ಆಪ್ಲ್ಯಾ ವಾಹನಾಂಕ್ ಆನಿ ಶೊಪಾಂಕ್ ‘ಪೊಂಪಯ್’ ಮಳ್ಳೆಂ ನಾಂವ್ ದಿಲ್ಲೆಂ ಪಳಂವ್ಕ್ ಮೆಳ್ತಾ. ಅಕ್ರಿಸ್ತಾಂವಾ ಮದೆಂಯ್ ಪಾತ್ಯೆಣೆಚಿಂ ಬೊಗ್ಣಾಂ ಆಸಾತ್ ಜಾಲ್ಲ್ಯಾನ್ ಸುರ್ವೆರ್ ಥಾವ್ನ್ ತಾಂಕಾಂಯೀ ಪೊಂಪಯ್ ಮಾಯ್ ಮೊಗಾಚಿ ಜಾವ್ನ್ ಆಸಾ. ವರ್ಸಾ ಮದೆಂ ಪೊಂಪಯ್ ಮಾಯೆಚ್ಯಾ ಪೂನ್ ಶೆತಾಚೆ ಭೆಟೆಕ್ ಯೆಂವ್ಚ್ಯಾ ಆನಿ ಫೆಸ್ತಾ ದಿಸಾ ಭೆಟ್ ಕರ್ನ್ ವಾತಿ ಪೆಟಂವ್ಕ್ ಯೆಂವ್ಚ್ಯಾ ಅಕ್ರಿಸ್ತಾವಾಂಚೊ ಸಂಖೊ ವ್ಹಡ್ ಆಸಾ ತೊ ಪಳೆತಾನಾ ತಾಂಕಾಂಯೀ ಆಸ್ಚಿ ತಿ ಪಾತ್ಯೆಣಿ ಆನಿ ಭಕ್ತ್ ರುಜು ಜಾತಾ. ಆತಾಂ ಆಧುನಿಕ್ ಕಾಳಾ ತೆಕಿದ್ ಫೆಸ್ತಾಚೆಂ ಆಚರಣ್ ಜಾತಾ ತರೀ ಮಾಲ್ಘಡ್ಯಾಂಕ್ ಆದ್ಲೆ ಉಡಾಸ್ ಮಾಜ್ವೊಂಕ್ ನಾಂತ್.
ಪೊಂಪಯ್ ಮಾಯ್ ಆಮಾ ಸರ್ವಾಂ ಪಾಸುನ್ ವಿನಂತಿ ಕರುಂ. ಸರ್ವಾಂಕ್ ಪೊಂಪಯ್ ಮಾಯೆಚ್ಯಾ ಫೆಸ್ತಾಚೆ ಉಲ್ಲಾಸ್!
.jpg)
